Asteazkenetik kaleak musikaz, kolorez eta topaketaz bete dituzten santixabel jaiak azken txanpan sartu dira
Asteazkenean suziriarekin abiatu ziren Usurbilgo jaiak, eta herria jai giro betean iritsi da azken asteburura. Larunbateko eta igandeko egitarauak tradizioa, herri kirola, musika eta auzolana uztartuko ditu, adin guztietako herritarrentzat pentsatutako dozenaka ekitaldirekin.
Larunbat eguerdian Elektroxarangak emango dio hasiera kaleko giroari, eta berehala izango da herritarren arteko lehia piztuko duen hitzorduetako bat: herri kirolen txapelketa. Herritarrek osatutako taldeek txinga eramatea, trontza, aizkora, korrika, zaku lasterketa, giza proba eta harri jasotzea bezalako probetan neurtuko dituzte indarrak eta trebetasuna. Ondoren, Askatasuna plazan egingo den zikiro jana izango da elkargune nagusia.
Santixabel eguneko soka-dantza. Usurbilgo Udala
Arratsaldean ere ez da jarduerarik faltako. Sutargi erromeriak eta errekortarien zezen ikuskizunak ikusle ugari erakartzea espero da, eta buruhandi eta erraldoiek berriz ere hartuko dituzte herriko kaleak. Gauean, berriz, musikak hartuko du protagonismoa. Frontoian Izan Bai eta Bele taldeek joko dute, eta txosnagunean Bad Sound eta Fifi eta Fefa DJaren emanaldiek luzatuko dute festa goizaldera arte. Kitadelpare txaranga ere kalez kale ibiliko da, eta eguna gaupaseroen argazki tradizionalarekin amaituko da.
Igandean amaituko dira jaiak
Igandeak, jaietako azken egunak, goiz-goizetik izango du mugimendua. Trikitilariek alaitutako esnadeiaren ondoren, puzgarriak izango dira haurrentzat, eta joaldunek Egurtzegitik abiatuta egingo dute kalejira.
Arratsaldean, buruhandi eta erraldoiek azken agerraldia egingo dute, Artzabalen A toda madre mariatxi taldearen emanaldia izango da, eta txosnetan paella lehiaketak giro aparta sortuko du. Azkenik, maskota erreko dute.
